Կիլիկիայի հայկական Օշինի դղյակը հավանորեն կվերականգնվի

Ներկայիս Թուրքիայի Մերսին նահանգի Չամլըյայլա գավառում ավերակ վիճակում գտնվող` Կիլիկիայի հայկական Օշինի դղյակը (թուրք. անվանումը` Սինապի ամրոց) վերականգման կարիք ունի. հաղորդում է թուրքական «Դողան» լրատվական գործակալությունը:

Աղբյուրի հաղորդմամբ` սույն հայկական միջնադարյան դղյակը 10-րդ և 11-րդ դարերում հայերի կողմից գործածվել է պաշտպանական նպատակներով, սակայն ներկայում ավիրված վիճակում է: Տեղի բնակիչներն անհանգստանում են, որ դղյակը շուտով լիովին կվերանա:

Թուրքիայի քաղաքացիները պահանջում են վերականգնել այն զբոսաշրջությունը զարգացնելու նպատակով: Այսպես` Անկարայից Ադանա այցելած Իզզեթ Քյոքենը նշել է. «Ամրոցը ողբալի վիճակում է: Երեխաներս ցանկացան տեսնել այն, բերեցի, բայց լրիվ քանդված է: Վախենում եմ ներս մտնել: Անհանգստանում եմ, թե երեխաներիս վրա քար կընկնի»:

Ընտանյոք հանդերձ ամրոցը տեսնելու եկած Սյուլեյման Քարաբելենն էլ պահանջել է, որ վերանորոգման աշխատանքները հնարավորինս շուտ սկսվեն:

Թարգմանեց Մելինե Անումյանը