Ադրբեջանական "սեւ ցուցակը" հավանորեն համալրվի

Ադրբեջանի ԱԳՆ-ն հետաքննում է Լեռնային Ղարաբաղի Հանրապետություն ռուսաստանցի լրագրող Միխայիլ Մորտունինի այցի փաստը: «Ադրբեջանի ԱԳՆ-ն Մոսկվայում մեր դեսպանությանը հանձնարարել է հետաքննել այդ տեղեկատվությունը»,- ըստ ադրբեջանական ԶԼՄ-ների`  այսօր հայտարարել է ԱԳՆ պաշտոնական ներկայացուցիչ Էլման Աբդուլաեւը:

Սեպտեմբերի 20-ին Rosbalt ռուսական տեղեկատվական գործակալությունը հրապարակել է Միխայիլ Մարտունինի «Հունվարին պաղած պատերազմը» հոդվածը, որում հեղինակն անդրադարձել է Արցախի Հանրապետության 20-ամյակին, արցախցիների առօրյային («Չար մարդկանց Ղարաբաղում ես այդպես էլ չհանդիպեցի».- հոդվածից), Ղարաբաղյան հակամարտությանը:

Հոդվածը սկսվում է այսպես. «Լեռնային Ղարաբաղի Հանրապետությունը նշեց իր 20-ամյա` ոչ ոքի կողմից չճանաչված անկախությունը: Նույնիսկ Հայաստանը չի ճանաչում Ղարաբաղը` դա համարելով որպես փոխզիջում բանակցություններում: Այնումենայնիվ, Ղարաբաղը պետություն է: Պարզապես շատ անսովոր»: