Գազայի հատվածում և Հորդանան գետի արևմտյան ափին բնակվող պաղեստինցիներին 480 ԱՄՆ միլիոն դոլար կհատկացվի. Քաթարի ԱԳՆ

Քաթարի էմիր Թամիմ բեն Համադ ալ Թանին որոշել է Իսրայելի հետ հերթական լարման ֆոնին Գազայի հատվածում և Հորդանան գետի արևմտյան ափին բնակվող պաղեստինցիներին 480 ԱՄՆ միլիոն դոլար հատկացնել: Այս մասին տեղեկացնում է Reuters գործակալությունը՝ վկայակոչելով Քաթարի արտաքին գործերի նախարարությանը:

Մոտ 300 միլիոն ԱՄՆ դոլար կհատկացվի Պաղեստինի ազգային վարչակազմին, որոնք ուղղված կլինեն առողջապահության և կրթության ոլորտների զարգացմանը:

Նշվում է նաև, որ ևս 180 միլիոն ԱՄՆ դոլար կուղղվի հումանիտար ծրագրերի իրականացմանը և պաղեստինյան տարածքների ամբողջ բնակչությանը  մշտական էլեկտրաէներգիայով ապահովելուն:

Հիշեցնենք, որ մայիսի 4-5-ը Գազայի հատվածում Իսրայելի և Պաղեստինի միջև բախումներ էին տեղի ունեցել, որոնք համարվում են վերջին 5 տարիների ընթացքում ամենախոշորը:  Հակամարտության սրման պատճառով զոհվել է 31 պաղեստինցի և 4 իսրայելցի: