ԱՄՆ վարչակազմը ձգտելու է հասնել այն բանին, որ Իրանը «նորմալ երկրի» գործելաոճ որդեգրի. Պոմպեո

ԱՄՆ վարչակազմը ձգտելու է հասնել այն բանին, որ Իրանը «նորմալ երկրի» գործելաոճ որդեգրի: Այս մասին երկուշաբթի Ֆինլանդիա այցի ժամանակ հայտարարել է ԱՄՆ պետդեպարտամենտի ղեկավար Մայք Պոմպեոն. տեղեկացնում է US News-ը`վկայակոչելով Associated Press-ը:

Նա մասնավորապես նշել է. «Մեր նպատակն այն է, որ Իրանն իրեն նորմալ երկրի պես պահի: Երբ նրանք համաձայնեն դրան, մենք պատրաստ ենք գործ ունենալ նրանց հետ»:

Հիշեցնենք, որ մայիսի 6-ին Պենտագոնի պաշտոնակատար Պատրիկ Շանահանը հայտարարել էր, որ Մերձավոր Արևելք «Աբրահամ Լինկոլն» ավիակիրն ուղարկելու որոշումն ընդունվել է իրանական ուժերի կողմից հնարավոր հարձակումից պաշտպանվելու ու հակահարված տալու համար: Նա թեմայի առնչությամբ իր  թվիթերյան միկրոբլոգում գրառում էր կատարել` նշելով. «Դա նախազգուշական վերատեղաբաշխում է: Խոսքը վերաբերում է իրանական ռեժիմից բխող իրական սպառնալիքի վերաբերյալ տեղեկատվությանը մեր արձագանքին»: