Փարիզի իշխանություններն արգելել են ապրիլի 20-ին «դեղին բաճկոնների» բողոքի ակցիաները Աստվածամոր տաճարի մոտակայքում

Փարիզի իշխանություններն արգելել են ապրիլի 20-ին «Դեղին բաճկոններ» շարժման բողոքի ակցիաները Սիտե կղզում` Փարիզի Աստվածամոր տաճարի մոտակայքում: Այս մասին տեղեկանում ենք Ֆրանսիայի մայրաքաղաքի ոստիկանության թվիթերյան պաշտոնական կայքէջից:

Հայտարարության մեջ, մասնավորապես, նշված է. «Փարիզի Աստվածամոր տաճարում տեղի ունեցած հրդեհից հետո Փարիզի ոստիկանությունը ստորագրել է հրամանագիր, ըստ որի` սահմանվում է անվտանգության պարագիծ, որի ներսում մարդկանց և փոխադրամիջոցների տեղաշարժերն արգելվում է»:

Ոստիկանության դիտարկմամբ`վերոհիշյալ որոշումն ընդունվել է «անվտանգության նկատառումներով»՝ մի քանի օր առաջ տաճարում տեղի ունեցած հրդեհի կապակցությամբ:
Սիտեից բացի` «դեղին բաճկոններ»-ի ցույցերն ապրիլի 20-ին արգելված են Ելիսեյան դաշտերում, ինչպես նաև  Ֆրանսիայի ղեկավարի նստավայրի` Ելիսեյան պալատի շրջակայքում: