Հեղափոխության մասին Փաշինյանի պատմությունները Թրամփին չեն հետաքրքրի

Լրագրողների հետ հանդիպման եկած քաղաքագետ, քաղաքական տեխնոլոգիաների մասնագետ Արմեն Բադալյանը, անդրադառնալով նոր իշխանությունների կողմից տարվող արտաքին քաղաքականությանը, ասաց, որ այստեղ նույնպես հստակ օրակարգ չկա:

«Օրինակ` ո՞րն է Հայաստան-Իրան տնտեսական օրակարգը,- շեշտեց քաղտեխնոլոգն ու շարունակեց,- եթե հանդիպեն Փաշինյանն ու Թրամփը, ապա ՀՀ վարչապետն ի՞նչ է ասելու ԱՄՆ նախագահին: Կասի` ես ՀՀ վարչապետն եմ, ապա կշարունակի` հեղափոխություն եմ անելու: Թրամփն էլ կասի, թե` դա արդեն 1500 անգամ ասել ես: Հասկանո՞ւմ եք` օրակարգ չկա, իսկ Ամերիկան այսօր փոխում է աշխարհը»:

Ըստ Բադալյանի` արտաքին քաղաքականությունը միայն Չինաստանից ճանապարհներ բարեկարգելու ու Ճապոնիայից ընտրությունների համար համապատասխան սարքեր ձեռք բերելու համար ֆինանսավորում խնդրելով չի պայմանավորված:

«Արաբական աշխարհի, Հնդկաստանի հետ որևէ շփում չկա, Լատինական Ամերիկայի տեղն ընդհանրապես չգիտեն, Ֆրանկոֆոնիան էլ եկավ-անցավ: Վարչապետը մի տարվա մեջ այցելել է մեկ-երկու եվրոպական երկիր, մյուս դեպքերում նրա այցերը պաշտոնական չեն եղել, այլ ուղղակի ինչ-որ մի միջոցառման կամ գագաթնաժողովի շրջանակում: Օրինակ` ԱՄՆ-ում մասնակցում էր ՄԱԿ-ի ԳՎ 73-րդ նստաշրջանին, բայց դա ԱՄՆ այց չէր նշանակում»,- շեշտեց Բադալյանը: