Չավուշօղլուն արձագանքել է Մակրոնի` Հայոց ցեղասպանության վերաբերյալ հրամանագրին

Երեկ` ապրիլի 10-ին, Ֆրանսիայի նախագահ Էմանուել Մակրոնը կատարեց հայ համայնքին տված խոստումը և ստորագրեց ապրիլի 24-ը Ֆրանսիայում որպես Հայոց ցեղասպանության հիշատակման օր հռչակելու մասին հրամանագիրը: Բացի Մակրոնի ստորագրությունից, հրամանագրում կա նաև վարչապետ Էդուար Ֆիլիպի ստորագրությունը: Ըստ հրամանագրի` ամեն տարվա ապրիլի 24-ին Փարիզում պաշտոնական արարողություններ կկազմակերպվեն, իսկ մյուս նահանգներում` ըստ տեղական իշխանությունների հայեցողության:

Պաշտոնական Անկարան անմիջապես արձագանքել է այս որոշմանը. հաղորդում է Deutsche Welle-ի թուրքական ծառայությունը: Թուրքիայի արտաքին գործերի նախարար Մևլութ Չավուշօղլուն իր թվիթերյան էջում գրել է. «Ֆրանսիայի նախագահ Էմանուել Մակրոնի հրամանագիրը Մարդու իրավունքների եվրոպական դատարանի և Ֆրանսիայի Սահմանադրական դատարանի որոշումների ակնհայտ խախտում է: Նախ և առաջ թող իրենց մութ պատմությանը նայեն: Ռուանդայի ցեղասպանությունից անցել է արդեն մեկ քառորդ դար»: