Տոմսն արժե 2500 դրամ, ճանապարհը տևում է 2 ժամ 10 րոպե. վարչապետը խորհուրդ է տալիս ուղևորվել նոր գնացքով

ՀՀ վարչապետ Նիկոլ Փաշինյանն արագընթաց գնացքով այս պահին մայրաքաղաքից ուղևորվում է Գյումրի: Վարչապետի հետ գնացքով Գյումրի են մեկնել նաև որոշ նախարարներ և պատգամավորներ:

Փաշինյանն իր ֆեյսբուքյան էջում ուղիղ եթերով ներկայացրել է ճանապարհը, գնացքի հարմարավետությունը`խորհուրդ տալով օգտվել:

«Գնացքն ամբողջովին նոր է, գործարանային վիճակում ներկրվել է Հայաստան: Ճանապարհն էլ շատ հետաքրքիր է, Հայաստանը ուրիշ կողմից ենք տեսնում»,- ասաց նա` հավելելով, որ առաջին անգամ է Հայաստանում գնացքով ճանապարհ գնում:

Վարչապետը նշեց նաև, որ տոմսն արժե 2500 դրամ, Երևանից Գյումրի ճանապարհը տևում է 2 ժամ 10 րոպե: Նոր ներկրված գնացքը, նախորդի համեմատությամբ, ավելի մեծ թվով ուղևորներ կկարողանա տեղափոխել։