BraVo մրցանակը երաժշտական մշակույթի բնագավառում ավանդի համար շնորհվել է Շառլ Ազնավուրին

«Համաշխարհային երաժշտական մշակույթի բնագավառում ներդրած ավանդի համար» BraVo միջազգային պրոֆեսիոնալ երաժշտական մրցանակը հետմահու շնորհվել է ֆրանսահայ շանսոնյե Շառլ Ազնավուրին: Դափնեկիրների հայտարարման արարողությունը  տեղի է ունեցել մարտի 21-ին Կրեմլի պետական պալատում:

«Աշխարհը կորցրեց մեծ արտիստի, բայց նրա արվեստը շարունակում է ապրել եւ դեռ երկար ու երկար կլուսավորի ոչ մեկ սերունդ: Եվ այսօր «Համաշխարհային երաժշտական մշակույթի բնագավառում ներդրած ավանդի համար» անվանակարգում BraVo միջազգային պրոֆեսիոնալ երաժշտական մրցանակը մենք շնորհում ենք Շառլ Ազնավուրին»,- հայտարարել է արարողությունը վարող Ֆիլիպ Կիրկորովը: 

Արձանիկը կհանձնվի երգչի ընտանիքին:

Ազնավուրի «Հավերժական սեր» երգը համերգի ժամանակ կատարել է Թամարա Գվերծիթելին:

«Անկարելի է Շառլ Ազնավուրի մասին խոսել անցյալ ժամանակով: Նա համաշխարհային երաժշտության գանձարան է: Շնորհակալություն, մաեստրո', Ձեր երաժշտության, երգերի համար, որոնք ավելի գեղեցիկ, ավելի երջանիկ դարձրին մեր աշխարհը»,- ասել է նա: