ՌԴ ԱԳՆ-ն զգուշացնում է Ադրբեջան մեկնող ՌԴ քաղաքացիներին հնարավոր վտանգների մասին

Ադրբեջանի սահմանապահ ծառայությունը շարունակում է ԼՂ խնդրի չկարգավորված լինելու պատրվակի ներքո մերժել Ադրբեջան մուտք գործել ցանկացող յուրաքանչյուր ՌԴ քաղաքացու, ով ուղիղ կամ անուղղակի ծագումնաբանական կապ ունի հայ ազգի հետ: Ադրբեջան մուտք գործելու մերժումը սահմանապահ ծառայությունը մեկնաբանում է այդ մարդկանց անվտանգությունը ապահովելու անհնարինությամբ:Ռուսական կողմը բազմիցս դիմել է ադրբեջանական կողմին` հայտնելով, որ անթույլատրելի է ՌԴ քաղաքացիների` Ադրբեջան մուտքը սահմանափակելը և նրանց նկատմամբ խտրական վերաբերմունք ցուցաբերելը: Սակայն ադրբեջանական կողմը չի արձագանքել ՌԴ դիմումներին: Հաշվի առնելով վերոգրյալը, խորհուրդ է տրվում Ադրբեջան մեկնել ցանկացող ՌԴ քաղաքացիներին հաշվի առնել հնարավոր ռիսկերը: Այս հայտարարությունը հրապարակել է ՌԴ ԱԳՆ պաշտոնական կայքը: