Առանց մամուլի ժողովրդավարություն չկա. Գերմանիայի ԱԳ նախարարը` Թուրքիային

Անկարա-Բեռլին հարաբերություններում նոր լարվածություն է առաջացրել Թուրքիայում աշխատող երկու գերմանացի լրագրողների` երկիրը հարկադրաբար լքելու պատճառով:

«Գերմանացի թղթակիցների` Թուրքիայում անազատ աշխատելն անընդունելի է: Առանց մամուլի չկա ժողովրդավարություն»,- հայտարարել է Գերմանիայի ԱԳ նախարար Հայկո Մաասը:

Գերմանական Tagesspiegel թերթին տված հարցազրույցում նա հայտնել է, որ ցանկանում են երկխոսություն սկսել Թուրքիայի հետ այդ թեմայով. հաղորդում է Euronews-ի թուրքական ծառայությունը:

Թուրքիայում 22 տարի գործունեություն ծավալող Tagesspiegel-ի թղթակից Թոմաս Զիբերտը և ZDF հեռուստաընկերության Ստամբուլի բյուրոյի ղեկավար Յորգ Բրազեն կիրակի օրը երկրից հեռանալուց հետո հայտարարություն են տարածել: «Թուրքական կառավարությանը հաջողվեց լռեցնել ազգային մամուլը: Հիմա նույնը փորձում են կիրառել միջազգային մամուլի նկատմամբ: Չպետք է հանձնվենք»,- ասվում է հայտարարության մեջ: