Մշակույթի և ԿԳ նախարարությունների «օժիտի» հարցը դեռևս չի լուծվել

Նախարարությունների միավորումը սկզբնական փուլում մեխանիկական է լինելու: Yerkir.am-ի հարցին, թե մշակույթի նախարարության հետ կարգավորե՞լ են «օժիտի» հարցը, այսպես պատասխանեց կրթության և գիտության նախարար Արայիկ Հարությունյանը: «Նախ` նախարարությունները կմիավորվեն իրենց ամբողջական կազմով, կառուցվածքով, ու հընթացս փուլ առ փուլ կհասկանանք, թե ինչ փոփոխություններ կարող են տեղի ունենալ»,- ասաց նա:

Հիշեցնենք, որ դեռ մոտ մեկ ամիս առաջ, երբ հայտնի դարձավ, որ մի քանի նախարարություններ միավորվելու  են, մշակույթի նախարարի պաշտոնակատարն ասել էր, թե դեռևս «օժիտի» փուլում են, փորձում են հասկանալ` ինչ են տանում, ինչ` թողնում:

Արայիկ Հարությունյանն ասաց, որ երբ միավորումը լինի վերջնական, այդ ժամանակ էլ կմտածեն «օժիտի» բաշխման մասին:

Yerkir.am-ի մյուս հարցին` դեռևս պարզ չէ՞, թե քանի մարդ է կրճատվելու նախարարությունների միավորման հետևանքով, նա պատասխանեց` այդ մասին նույնպես որևէ հստակ տվյալ չկա: