Հայաստանն ապրանքների մեկ քառորդը ներկրում է ԵՏՄ անդամ երկրներից. Տիգրան Խաչատրյան

Հայաստանն ապրանքների մեկ քառորդը ներկրում է ԵՏՄ անդամ երկրներից. ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում հայտնեց ՀՀ տնտեսական զարգացման և ներդրումների նախարար Տիգրան Խաչատրյանը: Նա նաև փաստեց՝ ապրանքների թվում են էներգակիրները, վերջնական սպառման ապրանքները, և եթե Հայաստանն անմիջական սահման ունենար ԵՏՄ անդամ երկրների հետ, ապրանքաշրջանառությունն առանց որևէ խոչընդոտի կիրականացվեր:

«Մենք մեր ամբողջ ներմուծման մեկ քառորդը ներկրում ենք ԵՏՄ անդամ երկրներից, ինչը մոտ 1 մլրդ 250 մլն դոլար է կազմում», - նշեց նախարարը:

Խաչատրյանը նաև անդրադարձավ իր ղեկավարած գերատեսչության գործունեության  հիմնական  ուղղություններին, այդ թվում` առևտրային քաղաքականությանը, հարաբերություններին, որոնք կապված են երրորդ երկրների հետ առևտրային հարաբերությունների, ապրանքների և ծառայությունների ազատ տեղաշարժի հետ, ինչպես նաև ԱՀԿ անդամակցությանը, ներդրումային քաղաքականությանը և այլն: