Հյուսիսային Կորեան կասկածվում է կիբեռկողոպուտների փորձերի մեջ. ԱՄՆ

Հյուսիսային Կորեան ակտիվացրել է  կիբեռհարձակումների միջոցով համաշխարհային բանկերից փող գողանալու փորձերը, կարծում է ԱՄՆ-ն: Այս մասին հայտնում է CNN-ը:

ԱՄՆ գլխավոր դատախազի օգնական Ջոն Դեմերսը նշել է` Հյուսիսային Կորեայի իշխանությունների կողմից վերահսկվող հաքերները ամերիկյան պատժամիջոցների պատճառով աշխուժացել են:

 Օգտագործվում են տարբեր միջոցներ՝ բանկերի ներքին համակարգերի արգելափակումից մինչև գաղտնագրերը գտնելու ճանապարհով ուրիշների հաշիվներից ոչ կանխիկ միջոցների փոխանցումը:

Հավելենք, որ 2017 թվականի մայիսին հայտնի է դարձել`  Բանգլադեշի Կենտրոնական բանկի վրա հաքերային հարձակման հետևում կանգնած է «Lazarus» անունով խումբը: Վերջինս գործել է Հյուսիսային Կորեայի հետախուզության շահերի շրջանակում, ինչի արդյունքում հաքերներին հաջողվել էր տանել 81 մլն դոլար:

Կենտրոնական բանկի վրա հարձակումից բացի` Lazarus-ից հաքերները կարող են մասնակցած լինել Sony Corporation-ի մեջ մտնող կինոընկերությունից ամենախոշոր կորպորատիվ արտահոսքերից մեկի կազմակերպմանը:

Հաքերները պատասխանատու են նաև տարբեր երկրների կայքերը կոտրելու համար, ինչպիսիք են Ճապոնիայի և Չինաստանի դեղագործական ընկերությունները, ԱՄՆ-ի, Կանադայի, Մեծ Բրիտանիայի և այլ երկրների համալսարանները: