«Տիգրան Պետրոսյանի անվան շախմատի տուն» այլևս չի լինելու. կառավարության որոշում

Կառավարությունն այսօրվա նիստում որոշվեց միավորել «Տիգրան Պետրոսյանի անվան շախմատի տուն» և «Հ. Գասպարյանի անվան շախմատի և շաշկու օլիմպիական մանկապատանեկան մարզադպրոց» ՊՈԱԿ-ները:

Որոշումը հիմնավորվում է հետևյալ կերպ. «Հաշվի առնելով միևնույն գործառույթներն իրականացնող պետական ոչ առևտրային կազմակերպությունների օպտիմալացման վերաբերյալ հանձնարարականը, ինչպես նաև դրանց գործունեության նպատակահարմարության և գործառույթների հստակ ու չկրկնվող լինելու անհրաժեշտությունը՝ ՀՀ սպորտի և երիտասարդության հարցերի նախարարության ենթակայության  «Տիգրան Պետրոսյանի անվան շախմատի տուն» և «Հ. Գասպարյանի անվան շախմատի և շաշկու օլիմպիական մանկապատանեկան մարզադպրոց» ՊՈԱԿ-ները վերակազմավորվում են միացման եղանակով և իրավահաջորդության կարգով գործունեությունը շարունակում է «Տիգրան Պետրոսյանի անվան շախմատի և շաշկու օլիմպիական մանկապատանեկան մարզադպրոց» պետական ոչ առևտրային կազմակերպությունը:

Իրավական ակտի ընդունումով ակնկալվում է գործառույթների հստակեցում և կրկնությունների բացառում:

Հավելենք, որ կառավարության որոշման նախագծի նախնական տարբերակում Տիգրան Պետրոսյանի անունն ընդհանրապես չկար, սակայն հետագայում որոշվեց պահպանել այն: