Գեղարքունիքի մարզի Վերին Գետաշեն համայնքում իրավիճակը թեժ է

Գեղարքունիքի մարզի Վերին Գետաշեն համայնքում իրավիճակը թեժ է: Ըստ «Հիդրոկորպորացիա» ընկերության տարածած հաղորդագրության՝ մի շարք գյուղացիներ, համայնքի ղեկավար Տիգրան Մուրադյանի ղեկավարությամբ, ապօրինի բռնազավթել են ընկերությանը պատկանող «Արգիչի» հիդրոէլեկտրակայանն ու սպառնում են դադարեցնել դրա գործունեությունը:

Պատճառը համայնքապետարանի ներկայացրած պահանջն է ընկերությանը տարեկան կտրվածքով, սկսած 2015-ից, համայնքին 50 միլիոն դրամ վճարելու վերաբերյալ:

Ըստ համայնքի ղեկավարի պահանջագրի՝ 2015թ.-ին հիդրոէլեկտրակայանը կառուցվել է՝ ամեն տարի ընկերության եկամուտներից համայնքի զարգացմանն ուղղված ներդրումներ կատարելու պայմանով, սակայն մինչ օրս ընկերությունը ոչ մի լումա չի հատկացրել:

Ընկերությունից հակադարձում են, որ, իրավական պարտավորություն չկրելով, մեծ ներդրումներ են իրականացրել համայնքում՝ վերանորոգել ճանապարհները, օգնություն տվել անապահով ընտանիքներին: «Հիդրոկորպորացիա ընկերությունը» համայնքապետարանի պահանջն ապօրինի է համարում եւ դիմել է իրավապահներին՝ քրեական գործ հարուցելու պահանջով: