Ֆրանսիայում ձերբակալվածների թիվը գերազանցել է 8.000-ը. ՆԳ նախարար

Ֆրանսիայում բողոքի ակցիաների սկսվելուց հետո ձերբակալվածների թիվը գերազանցել է 8 հազարը:  Այս մասին տեղեկացնում է France info-ն:

«Նոյեմբերի սկզբից`  Ֆրանսիայում «դեղին բաճկոնների» ակցիաների սկսվելուց հետո, ձերբակալվել է մոտ 8400 մարդ»,-  հայտնել է երկրի ՆԳ  նախարար Քրիստոֆ Կաստաները:

Նրա հաղորդմամբ՝  այս պահի դրությամբ մոտ 7500 քաղաքացի կալանավորված է:

Լրատվամիջոցը նաև հաղորդում է, որ իրավապահ մարմինների 1300 աշխատակից ցույցերի ժամանակ տարբեր աստիճանի մարմնական վնասվածքներ է ստացել:

Ավելի վաղ հաղորդվել էր, որ Ազգային ոստիկանության գլխավոր տեսչությունը ցուցարարներից մեկի ծանր վնասվածքի փաստով քննություն է սկսել:

Հիշեցնենք, որ Ֆրանսիայում «դեղին բաճկոնների» զանգվածային ակցիաները սկսվել են նոյեմբերի 17-ից:  Ցուցարարները պահանջում են չբարձրացնել վառելիքի եւ բենզինի գները: Փետրվարի 9-ին անցկացվեց 13-րդ բողոքի ակցիան: