Turan գործակալության տնօրենը բացատրել է` ինչու է իրենց թղթակիցը ժամանել Երևան

Այսօր հայտնի դարձավ, որ ադրբեջանական Turan գործակալության թղթակիցը Երևանում է: Այդ մասին դեռ օրեր առաջ հայտնել էր ՀՀ նախագահի խորհրդական Թևան Պողոսյանը` նշելով, որ հարցազրույց է տվել Շահին Հաջիևին:

Turan գործակալության տնօրեն Մեհման Ալիևը Minval.az-ի հետ զրույցում ասել է, որ Հաջիևն արդեն 3 օր է` Երևանում է և այսօր կվերադառնա Բաքու: «Մեր թղթակցի` Երևան այցի նպատակն է Ադրբեջանի դեմ Հայաստանի ագրեսիայի մասին ֆիլմի նկարահանումներին մասնակցությունը»,-նշել է նա:

Մեհման Ալիևի խոսքով` ֆիլմը նկարահանվում է փուլերով, նկարահանումներ են տեղի ունեցել Թուրքիայում, ԱՄՆ-ում և Ռուսաստանում:

Ըստ նրա` ադրբեջանցի լրագրողի այցի մասին նախապես տեղեկացվել են նախագահի աշխատակազմը, ԱԳՆ-ն, սահմանապահ ծառայությունը, և այդ բոլոր գերատեսչությունները տվել են իրենց համաձայնությունը: