Քոչարյանին երկու անգամ տեսակցել են որդին ու դուստրը

Կալանքի տակ գտնվող` ՀՀ երկրորդ նախագահ Ռոբերտ Քոչարյանին երկու անգամ տեսակցել են որդին ու դուստրը։ Այս մասին Վերաքննիչ քրեական դատարանում  լրագրողների հետ զրույցում ասաց երկրորդ նախագահի  պաշտպաներից Արամ Օրբելյանը:

Նա նշեց, որ տեսակցության հարցը ոչ ամբողջությամբ, բայց որոշակիորեն լուծվել է, այսինքն` արգելքը գործում է, բայց եղել են բացառություններ. Քոչարյանին երկու անգամ տեսակցել են որդին ու դուստրը:

Ինչ վերաբերում է Քոչարյանին համակարգիչ տրամադրելու հարցին` Օրբելյանը նշեց, որ այդ հարցը դեռ չի լուծվել: «Այստեղ կան որոշակի օրենսդրական հարցեր»,-- նշեց նա:

 Հիշեցնենք, որ վերաքննիչ քրեական դատարանը, դատավոր Մնացական Հարությունյանի նախագահությամբ, քննում է Քոչարյանի խափանման միջոցի վերաբերյալ պաշտպանական խմբի ներկայացրած բողոքը: Երևան քաղաքի ընդհանուր իրավասության դատարանի՝ 18.01.2019 թ․ որոշմամբ, բավարարվել է Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ և մերժվել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին: Դատարանի այս որոշման դեմ պաշտպանական խումբը վերաքննիչ բողոք է ներկայացրել: