Քաղաքական ապաստան խնդրող վրացիների թիվն աճում է. Եվրոպայում անհանգստացած են

Թբիլիսիում եվրոպական հինգ երկրների դեսպաններ ցանկանում են Վրաստանի ՆԳՆ ղեկավար  Գեորգի Գախարիայի հետ քննարկել քաղաքական ապաստան տրամադրելու վերաբերյալ Վրաստանի քաղաքացիներից ստացվող դիմումների աճի հարցը. հայտնում է Интерфакс-ը:

«Շենգենյան գոտու երկրներում՝ Ֆրանսիայում, Գերմանիայում, Շվեդիայում, Հունաստանում և Շվեյցարիայում, լրջորեն անհանգստացած են Վրաստանի քաղաքացիների կողմից քաղաքական ապաստանի համար դիմումների աճի կապակցությամբ, ուստի մենք ցանկանում ենք Վրաստանի ներքին գործերի նախարարի և վրացական կառավարության հետ քննարկել ու գտնել այդ հարցի լուծումը»,- լրագրողներին ասել է Վրաստանում Ֆրանսիայի դեսպան Պասկալ Մենիեն:

Նա նշել է, որ միայն 2018-ի դեկտեմբերին Վրաստանի մոտ 1000 քաղաքացի դիմել է Ֆրանսիայի իշխանություններին` քաղաքական ապաստան ստանալու խնդրանքով:

Դեսպանը հայտնել է, որ եվրոպական երկրների կառավարություններն անհանգստացած են նաև Եվրոպայի երկրներում Վրաստանի քաղաքացիների կողմից հանցագործությունների կատարման աճից: