Լեհաստանի գործերի հավատարմատարը կանչվել է Իրանի ԱԳՆ

 «ԻՌՆԱ»-Ի տեղեկացմամբ՝ փետրվարի 13-14-ին Լեհաստանում անցկացվելիք «Խաղաղությունն ու անվտանգությունը Մերձավոր Արեւելքում» խորագրով հակաիրանական խորհրդաժողովի կապակացությամբ՝ Իրանում Լեհաստանի գործերի հավատարմատարն ԱԳն է կանչվել:

Լեհ դիվանագետի հետ հանդիպել է Իրանի ԱԳՆ Արեւելյան Եվրոպայի բաժնի առաջին վարչության պետը, որն Իրանի Իսլամական Հանրապետության անունից պաշտոնական բողոք է հայտնել Լեհաստանին՝ հակաիրանական խորհրդաժողովն հյուրընկալելու կապակցությամբ. «Սա ԱՄՆ-ի կողմից հակաիրանական ակնհայտ քայլ է: Ակնկալում ենք, որ այս խորհրդաժողովը կազմակերպելու գործում Լեհաստանը չի համագործակցի ԱՄՆ-ի հետ»,- ասել է իրանցի դիվանագետը:

Լեհաստանի գործերի հավատարմատարն էլ բացատրություններ է ներկայացրել խորհրդաժողովի կապակցությամբ՝ նշելով, որ այն հակաիրանական բնոյթ չի կրում եւ պաշտոնական Վարշավայի տեսակետները տարբերվում են ԱՄՆ դիրքորոշումներից: Իրանի ԱԳՆ ներկայացուցիչն անբավարար է համարել լեհ դիվանագետի ներկայացրած բացատրությունները եւ նշել, որ պաշտոնական Թեհրանն ակնկալում է, որ Լեհաստանը քայլեր կձեռնարկի իրավիճակի շտկման կապակցությամբ, հակառակ դեպքում Իրանը ստիպված կլինի համարժեք քայլերի դիմել: