Ժնեւյան հանդիպումն ավարտվել է առանց որոշակի ձեռքբերման

Դեկտեմբերի 18-ին Ժնեւում Սիրիայի հարցերով ՄԱԿ-ի հատուկ բանագնաց Ստաֆան դե Միստուրայի  նախաձեռնությամբ կայացած` Իրանի, Ռուսաստանի եւ Թուրքիայի ԱԳ նախարարների հանդիպումը, ըստ BBC-ի,  ավարտվել է առանց որոշակի ձեռքբերման:

Հանդիպումը կազմակերպվել էր՝ քննարկելու սիրիական ճգնաժամի հետ կապված վերջին իրադարձություններն ու Սիրիայի նոր Սահմանադրական օրենքի մշակման նպատակով հատուկ հանձնաժողովի ձեւավորման թեման:

Հանդիպման ավարտին Զարիֆը, Լավրովն ու Չավուշօղլին հանդես են եկել համատեղ հայտարարությամբ, որը լրագրողներին է ներկայացրել ՌԴ ԱԳ նախարարը:

Կարեւորելով Սիրիայի տարածքային ամբողջականության պահպանումը՝ կողմերը պահանջել են, որ խաղաղության գործընթացի կարգավորման նպատակով 2019 թվականի սկզբին Սիրիայի նոր Սահմանադրական օրենքի մշակման հատուկ հանձնաժողովը սկսի իր աշխատանքները: Ձեւավորվող հանձնաժողովը պետք է կյանքի կոչվի «համաձայնության եւ կառուցողական գործակցության» սկզբունքի հիման վրա:

Ստաֆան դե Միստուրան, իր հերթին, հայտարարել է, որ բոլոր կողմերի համար ընդունելի է համազգային հանձնաժողովի ձեւավորումը, այն հավելյալ ջանքեր եւ ժամանակ է պահանջելու: