ՀԱՊԿ գլխավոր քարտուղարի ընտրության հարցը պետք է լուծել` կառույցի արդյունավետությունը չթուլացնելով. ՌԴ դեսպան

ՀԱՊԿ-ի վերաբերյալ ՌԴ դիրքորոշումը հիմնված է այդ կառույցի և  անդամ երկրների փոխհարաբերությունների ամրապնդման վրա։ Այդ մասին լրագրողների հետ հանդիպման ժամանակ նշեց Հայաստանում Ռուսաստանի դեսպան Սերգեյ Կոպիրկինը։

«ՀԱՊԿ գլխավոր քարտուղարի ընտրության հարցը պետք է այնպես լուծվի, որ կառույցի արդյունավետությունը ոչ միայն չթուլանա, այլև ամրանա։ Այն հիմա կարգավորվում է պետությունների ղեկավարների մակարդակով, և դա մեր ընդհանուր հետաքրքրությունների շրջանակներում է»,- ասաց Կոպիրկինը։

Ինչ վերաբերում է Լեռնային Ղարաբաղի հակամարտության կարգավորմանը, ռուս դիվանագետը նշեց, որ  Ռուսաստանի դիրքորոշումն անփոփոխ է՝ աշխատում են ԵԱՀԿ Մինսկի խմբի շրջանակներում և շարունակելու են աշխատել:

«Մենք ելնում ենք այն բանից, որ հակամարտության խաղաղ կարգավորումն այլընտրանք չունի:  Այն պետք է տեղի ունենա երկու կողմերի համաձայնությամբ: Մեր աշխատանքի առաջնահերթ ուղղություններից է՝ կողմերի միջև ձևավորել ուղիղ երկխոսության համար բարենպաստ պայմաններ»,- ամփոփեց դեսպանը: