Նախիջևանում թուրքական ռազմաբազա ստեղծելու անհրաժեշտություն չկա. Թուրքիայի հետախուզության վարչության նախկին ղեկավար

Երեկ տեղեկացրել էինք, որ Թուրքիան հնարավոր է ռազմաբազա բացի Նախիջևանում: Այդ մասին գրել էր թուրքական իշխանամետ Sözcü պարբերականը` իր աղբյուրներին հղումով:

Թուրքիայի զինված ուժերի գլխավոր շտաբի հետախուզության վարչության նախկին ղեկավար Իսմայիլ Հագգը Փեքինը Turan-ի հետ զրույցում հայտարարել է, որ Նախիջևանում թուրքական ռազմաբազա ստեղծելու անհրաժեշտություն չկա:

«Նախիջևանում գտնվում է Ադրբեջանի ԶՈՒ կորպուսը, Թուրքիան անհրաժեշտ աջակցություն է տրամադրում։ Այնտեղ են գտնվում մեր ռազմական խորհրդատուները, Թուրքիան սերտորեն համագործակցում է Նախիջևանի սահմանապահ զորքերի ու հատուկ նշանակության ուժերի հետ»,- ասել է նա:

Փեքինը նաև ուշադրություն է հրավիրել այն փաստին, որ Նախիջևանում թուրքական ռազմաբազայի բացումը կասկածներ կառաջացնի Իրանի մոտ։ «Եվ ընդհանրապես` Նախիջևանում բազա ստեղծելու որևէ իմաստ չկա, քանի որ Թուրքիան առանց դրա էլ ինքնավարությանն անհրաժեշտ օգնություն է տրամադրում»,- ասել է նա։