Չորս «օրենքով գողերի» վերաբերյալ քրեական գործեր են քննվում

Երկու ամիս առաջ ոստիկանությունը հայտարարություն տարածեց, ըստ որի` քրեական հետախուզության գլխավոր վարչությունում հարուցված քրեական գործի շրջանակում խուզարկություններ են կատարել, այսպես կոչված, «օրենքով գողերի» և քրեական հեղինակությունների բնակարաններում:

Yerkir.am-ն այսօր ՀՀ ոստիկանապետ Վալերիյ Օսիպյանից հետաքրքրվեց, թե, ի վերջո, ի՞նչ գործի շրջանակներում են կատարվել այդ խուզարկությունները:

«Մենք այդ պահին ստացել էինք օպերատիվ տեղեկություններ, որ որոշ «օրենքով գողեր» պատրաստվում էին ՀՀ տարածքում ինչ-որ պարզաբանումներ անել: Ոստիկանությունը, ստանալով օպերատիվ տեղեկություններ, օրենքի շրջանակներում իրականացրել է համապատասխան խուզարկություններ, որոնց արդյունքում զենք-զինամթերք և թմրանյութեր էին հայտնաբերել»,- նշեց նա:

Ոստիկանապետը հայտնեց, որ հայտնաբերված զենքի մի մասն օրինական է եղել: Օսիպյանը միաժամանակ տեղեկացրեց, որ ներկայումս 4 «օրենքով գողերի» վերաբերյալ քրեական գործեր են քննվում: