Պետք է քրեական համաներում հայտարարել. Զոհրաբյանի կոչը` կառավարությանը

Շարունակվում է կառավարության կողմից հրավիրված ԱԺ արտահերթ նիստը: «Ծառուկյան» խմբակցության պատգամավոր Նաիրա Զոհրաբյանը կոչ արեց կառավարությանը` քրեական համաներում հայտարարել: Նրա խոսքով` քրեակատարողական հիմնարկները գերծանրաբեռնված են, և համաներում անպայման պետք է հայտարարվի:

«Բազմաթիվ կալանավորներ կան, որոնց արարքը հանրության համար վտանգավորությունը կորցրել է: Գնացեք դատապարտյալների հիվանդանոց. կալանավորներ կան` այնպիսի հիվանդություններ ունեն, որոնք անհամատեղելի են կալանավայրում պատիժը կրելու հետ»,- հայտարարեց Զոհրաբյանը:

Նա նշեց, որ տպավորություն է, թե կառավարությունը վերջին շրջանում խուսափում է համաներումից:

Պատգամավորը նաև անդրադարձավ վաղաժամկետ ազատ արձակման հանձնաժողովից եղած դժգոհություններին: «10 անգամ հանձնաժողովը տրանսֆորմացիայի ենթարկեցինք և որևէ անգամ դրա օգտակար գործողության գործակիցը չտեսանք: Ես կարծում եմ, որ ժամանակն է քննարկելու համաներում հայտարարելու հարցը: Վերջերս «Արմավիր» ՔԿՀ-ում էի, դեպքեր կան, որ մարդը կուրանում է, 8 տարի պատիժը կրել է, մի քանի ամիս է մնացել, և համաներում չկա: Դիմում եմ կառավարությանը` այս հարցը քննարկելու համար»,- նշեց նա: