Մասիսի քաղաքապետի նկատմամբ խափանման միջոցը փոխելու միջնորդության քննությունն ավարտվել է

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանում ավարտվեց Մասիսի քաղաքապետ Դավիթ Համբարձումյանի և նրա տեղակալ Կարեն Օհանյանի նկատմամբ խափանման միջոց ընտրելու վերաբերյալ միջնորդության քննությունը:

Դավիթ Համբարձումյանի պաշտպան Տիգրան Աթանեսյանը լրագրողների հետ զրույցում նշեց, որ այսօր` ժամը 15-ին, կհրապարակվի որոշումը: «Դավիթ Համբարձումյանը պետք է ազատ արձակվի: Երկու վկա տեսանյութում տեսել են դիմակավորվածի անձի և ասում են, որ նա Դավիթ Համբարձումյանն է։ Շինծու մեղադրանք է»,- ասաց փաստաբանը:

Տեղեկացրել էինք, որ դատարանի առջև մասիսցիներն են հավաքվել՝ ի պաշտպանություն քաղաքապետի: Նրանք հայտարարեցին, որ մինչև որոշման հրապարակումը կմնան դատարանի մոտ: