BBC-ի ռուսական ծառայության անդրադարձը Սերժ Սարգսյանի հրաժարականին

BBC-ի ռուսական ծառայությունն անդրադարձել է Սերժ Սարգսյանի հրաժարականին և Հայաստանում վերջին օրերին տեղի ունեցած իրադարձություններին:

Խոսելով այն մասին` ինչպիսին է լինելու երկրի ապագան, պարբերականը նշում է, որ Սերժ Սարգսյանն իր հրաժարականի դիմումում չի նշում` ինչպիսին են լինելու իշխանության հետագա քայլերը:

«Գոյություն ունի հետևյալ ենթադրությունը` Հայաստանի Հանրապետական կուսակցությունը կոալիցիոն գործընկեր Դաշնակցության հետ հեշտությամբ կընտրի այլ վարչապետի, որն այդքան չի նյարդայնացնի ընդդիմությանը և նրանց կողմնակիցներին, սակայն կներկայացնի նույն իշխող էլիտան: Հնարավոր է` Սարգսյանը, թողնելով իր պաշտոնը, մնա պետության ստվերային ղեկավար»,-գրում է պարբերականը:

Նշվում է, որ արտահերթ նախագահական ընտրությունների մասին Սարգսյանը նույնպես ոչինչ չի ասել:

Պարբերականն անդրադառնում է ընդդիմադիր «Ծառուկյան» դաշինքին, որը խորհրդարանում ներկայացնում է 31 պատգամավոր, և նշում, որ ներկայիս բողոքի ակցիաներին դաշինքի անդամները չեն մասնակցել: «Որոշ հայ վերլուծաբանների համաձայն` նրանցից որոշները ցանկացել են մասնակցել, սակայն «Ելք»-ի առաջնորդները թույլ չեն տվել»,- գրում է կայքը: