ԵՄ-ն հրապարակել է Թուրքիայի մասին ամենակոշտ զեկույցը

Եվրամիությունը հրապարակել է Թուրքիայի զարգացման զեկույցը տարբեր ոլորտներում ձեռք բերած հաջողությունների կամ անհաջողությունների մասին։

Ըստ DHA-ի՝ զեկույցում նշվել է, որ Թուրքիայում դեռևս պահպանվում է արտակարգ դրությունը և դրա ընթացքում հազարավոր մարդիկ են ձերբակալվում։ Զեկույցի համաձայն՝ արտակարգ դրության հայտարարումից մինչ օրս Թուրքիայում ձերբակալվել է 150000 մարդ, որոնցից 78000-ը կալանավորվել է։ Այդ ընթացքում 110․000  պետաշխատող էլ հեռացվել է աշխատանքից։

Զեկույցում անդրադարձել են նաև Թուրքիայի և Եվրամիության անդամ երկրների հարաբերություններին, որոնք, ըստ զեկույցի, վատանում են։ «Անընդունելի» են որակվել թուրք գործիչների ագրեսիվ հայտարարությունները ԵՄ երկրների հասցեին։

Զեկույցում նաև շեշտվել են քուրդ զինյալների դեմ գործողությունները, որոնք իրականացնելիս պետք է հարգվեն օրենքի գերակայությունն ու մարդու իրավունքները:

Թուրքական ԶԼՄ-ներն այս զեկույցը որակել են «իրենց մասին դեռևս հրապարակված ամենակոշտ զեկույցը»: