Կադրային փոփոխություններ՝ մարզերում. հանձնարարական

Այսօր` կառավարության հերթական նիստից առաջ, վարչապետ Կարեն Կարապետյանը հանձնարարական տվեց մարզպետարանների 2018թ. գործունեության ծրագրի վերաբերյալ: Վարչապետի խոսքով` մարզերի 2017թ. հաշվետվությունների ուսումնասիրման և խորհրդակցությունների արդյունքում պարզ է դարձել, որ բոլոր մարզերում, 2016թ. ցուցանիշների համեմատությամբ, արձանագրվել է զգալի դրական աճ` գյուղատնտեսական, սոցիալական, շինարարության, աղբահանության և այլ ոլորտներում:

Վարչապետը տարածքային կառավարման և զարգացման, ֆինանսների նախարարներին, մարզպետերին հանձնարարեց մեկամսյա ժամկետում ձեռնարկել միջոցներ մարզպետարանների ամենամյա զեկույցները վերանայելու ուղղությամբ` անդրադառնալով մեկ շնչին ընկնող` համայնքների սեփական եկամուտների աճի ցուցանիշներին, համայնքային բյուջետային ցուցանիշների հավաքագրման, ծախսային, աղբահանության աշխատանքները ծախսափակ եղանակով կատարելու համար անհրաժեշտ ցուցանիշներին:

Տարածքային կառավարման և զարգացման, ֆինանսների նախարարներին հանձնարարվեց նաև օրենքով սահմանված կարգով կադրային փոփոխություններ կատարել այն ոլորտներում, ուր արձանագրվել են բացթողումներ: