ԺՈՂՈՎՈՒՐԴ. Կադրային փոփոխություններ ԱԳՆ-ում

Լավատեղյակ աղբյուրներից հայտնի դարձավ, որ մի քանի լուրջ կադրային փոփոխություն է սպասվում ՀՀ արտգործնախարարությունում:

Ըստ այդմ` աշխատանքից ազատվելու են միանգամից երկու փոխնախարարներ` Արման Կիրակոսյանն ու Կարինե Ղազինյանը: Կիրակոսյանի փոխարեն փոխնախարար է դառնալու նախօրեին Չեխիայում ՀՀ դեսպանի պաշտոնից ազատված Աշոտ Հովակիմյանը, իսկ Ղազինյանին փոխարինելու է ԵԽԽՎ-ում ՀՀ մշտական ներկայացուցիչ Զոհրաբ Մնացականյանը:

Ինչ վերաբերում է փոխնախարարներին, ապա Ղազինյանը դառնալու է Մեծ Բրիտանիայում ՀՀ դեսպանը, իսկ Կիրակոսյանը, ամենայն հավանականությամբ, կդառնա ԵԽԽՎ-ում ՀՀ ներկայացուցիչ:

Մեր աղբյուրների փոխանցմամբ` այդ կադրային փոփոխությունները կատարվելու են միանգամից` մեկ փաթեթով:

ԱԳՆ մամուլի խոսնակ Տիգրան Բաբայանը չմեկնաբանեց այս լուրերը` ասելով, որ դա Սերժ Սարգսյանի լիազորությունների շրջանակում է: Իսկ նախագահականից չպատասխանեցին մեր հարցերին: