Գյուղացիները փակել են Վարդենիս-Երևան ճանապարհը. աշխատատեղ են ուզում

Վարդենիսի և շրջակա համայնքների բնակիչներն այս պահին փակել են Վարդենիս-Երևան ճանապարհը և պահանջում են, որպեսզի իրենց աշխատանք տրամադրեն: Այս մասին Yerkir.am-ի հետ զրույցում ասաց Սոթք գյուղի նախկին համայնքապետ Կոլիկ Շահսուվարյանը:

Նա նշեց նաև, որ տեղի բնակիչները հիմնականում աշխատում են «ԳեոՊրոՄայնինգ Գոլդ» ընկերության շահագործած ոսկու հանքավայրում:

«Մեզ մոտ ուրիշ աշխատատեղ չկա, իսկ էս մարդիկ էլ չեն ուզում երկրից հեռանալ, այլ՝ տեղում աշխատանք գտնել, ընտանիքը պահել ու ապրել: Դե, հասկանալի է, ընկերությունն էլ մասնագետներ է ընտրում, բոլորին չի կարող, չէ՞, աշխատանքի ընդունել: Բացի այդ` ընկերությունում աշխատողների 99 տոկոսը հենց մեր համայնքների բնակիչներն են»,- ասաց Շահսուվարյանը:

Ըստ նրա` կան մարդիկ՝ ասում են, թե որոշ աշխատակիցների ազատել են աշխատանքից, ինչի պատճառով էլ նրանք փակել են ճանապարհը, սակայն, կարծես, աշխատանքից ոչ մեկին չեն ազատել:

«ԳեոՊրոՄայնինգ Գոլդ»-ից մեզ հետ զրույցում նշեցին, որ աշխատանքից ազատումներ չեն եղել: «Այս պահին էլ մեզ մոտ աշխատանքի ընդունելություն է»,- ասացին մեզ: