Դեկտեմբերին Սարգսյան-Ալիեւ հանդիպման մասին տեղեկատվության Նալբանդյանը չի տիրապետում

ՌԴ ԱԳՆ ղեկավար Սերգեյ Լավրովի և ՀՀ ԱԳՆ ղեկավար Էդվարդ Նալբանդյանի մամուլի ասուլիսի ժամանակ լրագրողը հետաքրքրվեց` արդյո՞ք երեկվա և այսօրվա հանդիպումների արդյունքում հաջողվեց որևէ առաջընթացի հասնել, և քանի որ Ադրբեջանի ու Հայաստանի նախագահների հանդիպում է նախատեսված, մինչ այդ օրը պատրաստ կլինի՞ ինչ-որ փաստաթուղթ:

 Նալբանդյանը պատասխանեց, որ տեղյակ չէ, որ նման հանդիպում է նախատեսված: «Ինչ վերաբերում է ինչ-որ կտրուկ առաջընթացի, ես մեկ շաբաթ առաջ Երևանում մամուլի ասուլիսի ժամանակ ասացի, որ այստեղ դժվար է անիվ հորինել. կարգավորման հիմնական տարրերը, սկզբունքներն արդեն դրված են սեղանին, կան աշխատանքային փաստաթղթեր, կուտակված որոշ նյութ: Մենք շատ երկար ենք վարել բանակցությունները: Ադրբեջանն ասում է, որ մենք չենք ուզում բանակցել հիմնական սկզբունքների շուրջ, իսկ դուք խոսում եք ինչ-որ առաջընթացի մասին: Սակայն, չնայած Ադրբեջանի նման ապակառուցողական դիրքորոշմանը, անշուշտ, պետք է շարունակել բանակցությունները, որովհետև  բանակցային գործընթացին այլընտրանք չկա»,- ասաց ՀՀ արտգործնախարարը: