ԵԱՀԿ Մինսկի խմբի համանախագահների հայտարարությունը Սարգսյան-Ալիեւ հանդիպման վերաբերյալ

ԵԱՀԿ Մինսկի խմբի համանախագահները հայտարարություն են տարածել ՀՀ նախագահ Սերժ Սարգսյանի և Ադրբեջանի նախագահ Իլհամ Ալիևի՝ այսօր Ժնևում կայացած հանդիպման մասին:

ԵԱՀԿ պաշտոնական կայքից տեղեկանում ենք, որ նախագահները պայմանավորվել են միջոցներ ձեռնարկել բանակցային գործընթացը խորացնելու եւ շփման գծում լարվածության կրճատման ուղղությամբ լրացուցիչ քայլեր ձեռնարկելու վերաբերյալ:

Համանախագահները գոհունակություն են հայտնել նախագահների ուղիղ բանակցությունների առնչությամբ, որոնք տեղի են ունեցել տևական ժամանակ անց:

Համանախագահները կրկին հիշեցրել են իրենց` Ղարաբաղյան հակամարտության խաղաղ կարգավորման հարցում կողմերի միջև միջնորդ լինելու պատրաստակամությունը:

«Որպես հաջորդ քայլ՝ մոտ ապագայում համանախագահները աշխատանքային խորհրդակցություններ կանցկացնեն ԱԳ նախարարների հետ»,- նշվել է հայտարարության մեջ: