Էլեկտրական շարժիչով մեքենաները Հայաստան կներմուծվեն առանց հարկերի, տուրքերի ու գույքահարկի

Այսօր կառավարության նիստում վարչապետ Կարեն Կարապետյանը հանձնարարական տվեց էլեկտրական շարժիչով մեքենաների ներմուծման հարկերից, տուրքերից ու գույքահարկից ազատելու վերաբերյալ: Ըստ վարչապետի` ներկայումս գործող կարգավորումների համաձայն, էլեկտրական շարժիչներով մեքենաների ներմուծման ժամանակ կիրառվում են մի շարք հարկեր ու վճարներ:

«Հաշվի առնելով նշված մեքենաների`էկոլոգիապես մաքուր լինելը և ներմուծման ծավալների մեծացման անհրաժեշտությունը` հանձնարարում են փոխվարչապետին, տնտեսական զարգացման և ներդրումների նախարարին, բնապահպանության նախարարին, ՊԵԿ նախագահին` երկու ամսում համատեղ ուսումնասիրել էլեկտրական շարժիչով մեքենաների ներմուծման ժամանակ գանձվող հարկերից ու տուրքերից, ինչպես նաև գույքահարկից ազատելու վերաբերյալ գործող օրենսդրության փոփոխությունը` հաշվի առնելով նաև ԵՏՄ կարգավորումները, կառավարության աշխատակազմ ներկայացնել առաջարկություններ»,- ասաց վարչապետը: