Հայաստանում կոռուպցիայի դեմ պայքարը հսկելու են միջազգային կառույցները. հանձնարարական

Այսօր կառավարության նիստում վարչապետ Կարեն Կարապետյանը հանձնարարական տվեց հակակոռուպցիոն ոլորտում միջազգային պարտավորությունների կատարման վերաբերյալ:

«Բազմիցս հայտարարել ենք կոռուպցիայի դեմ պայքարում մեր վճռականության մասին, և վերջին մեկ տարում մեր կողմից նախաձեռնվել ու իրականացվել են մի շարք առարկայական, օրենսդրական, գործնական փոփոխություններ: 2018թ.-ին ՀՀ-ում կոռուպցիայի դեմ պայքարում իրականացված միջոցառումները գնահատվելու են մի շարք միջազգային կազմակերպությունների կողմից: Մասնավորապես՝ գնահատվելու են տնտեսական համագործակցության և զարգացման կազմակերպության հակակոռուպցիոն գործողությունների և ՄԱԿ-ի կոռուպցիայի դեմ կոնվենցիայի շրջանակներում կատարված աշխատանքները»,- ասաց վարչապետը:

Հաշվի առնելով վերոնշյալի կարևորությունը` վարչապետը հանձնարարեց արդարադատության նախարարին` ամփոփել և իրեն ներկայացնել առաջարկություններ համապատասխան պետական մարմինների կողմից կատարման ենթակա գործողությունների վերաբերյալ:

Հանձնարարվեց նաև կառավարության աշխատակազմի ղեկավարին` արդարադատության նախարարի կողմից ներկայացված տեղեկատվության հիման վրա նախապատրաստել վարչապետի հանձնարարականի նախագիծ՝ բոլոր շահագրգիռ մարմինների կողմից հստակ ժամկետներում իրենց իրավասության ներքո գտնվող գործողությունների վերաբերյալ: Գործողությունների գրառման վերաբերյալ սահմանել հստակ վերահսկողություն: