Մարզպետարանների աշխատակազմերում կստեղծվեն զբոսաշրջության զարգացման բաժիններ

Կառավարության այս շաբաթվա նիստի օրակարգում ներառված է որոշում կառավարության մի շարք որոշումներում փոփոխություններ կատարելու մասին, որի ընդունումը պայմանավորված է ՀՀ մարզպետարանների աշխատակազմերում (բացառությամբ ՀՀ Սյունիքի մարզպետարանի աշխատակազմի) զբոսաշրջության զարգացման ուղղությամբ գործառույթներ իրականացնող բաժինների ձևավորման անհրաժեշտությամբ:

ՀՀ կառավարության որոշմամբ համապատասխան փոփոխություններ կատարվեցին ՀՀ Սյունիքի մարզպետարանի աշխատակազմում: Նշված փոփոխությունների համաձայն աշխատակազմում ստեղծվել է զբոսաշրջության զարգացման գործառույթներ իրականացնող բաժին, որը գործում է միջազգային համագործակցության և զարգացման ծրագրերի վարչության կազմում:

ՀՀ Սյունիքի մարզպետարանից բացի մյուս մարզպետարանների աշխատակազմերում կատարված ուսումնասիրությունները ցույց են տալիս, որ մարզպետարանների կողմից զբոսաշրջության զարգացմանն ուղղված գործառույթներն իրականացվում են աշխատակազմերի զարգացման ծրագրերի և վերլուծության բաժինների միջոցով:

 Ելնելով վերը նշվածից, տարածքային կառավարման և զարգացման նախարարությունը  նպատակահարմար է գտնում մարզպետարանների աշխատակազմերի կառուցվածքում ընդգծել զբոսաշրջության բնագավառը:

Նախագծի ընդունմամբ մարզպետարանների աշխատակազմերի կառուցվածքներում կընդգծվեն զբոսաշրջության բնագավառի գործառույթներ իրականացնող ստորաբաժանումները: