Մարդկային զոհերը չենք կարող բացառել, քանի որ Ադրբեջանի նման հակառակորդ ունենք

Ի՞նչ քայլեր են արվում, որպեսզի շփման գծում զոհեր չունենանք. Հայաստան-Սփյուռք համաժողովի մասնակիցներից մեկը հարց ուղղեց Արցախի արտգործնախարար Կարեն Միրզոյանին։ Ի պատասխան` Միրզոյանը նշեց, որ բոլոր անհրաժեշտ քայլերն ու միջոցները ձեռնարկվում են` սահմանին կայուն իրավիճակ ապահովելու համար։ Նախարարի հավաստմամբ՝ իրավիճակը շփման գծում լիովին գտնվում է հայկական ստորաբաժանումների հսկողության տակ և այդպիսին շարունակելու է մնալ:

«Սակայն, ցավոք, չենք կարող բացառել մարդկային զոհեր, քանի որ դա մեզանից կախված չէ, քանի որ ունենք այնպիսի հակառակորդ, ինչպիսին Ադրբեջանն է։ Հայկական կողմը, բնականաբար, անում է ամեն ինչ՝ մարդկային կորուստները նվազագույնին հասցնելու համար»,- ասաց Միրզոյանը։

Հարցին` արդյո՞ք ազատագրված 7 տարածքների կարգավիճակի վերաբերյալ կան տարաձայնություններ Երևանի և Ստեփանակերտի միջև, նա պատասխանեց, որ Արցախի տարածք կազմող բոլոր հողերն ունեն նույն կարգավիճակը՝ դրանք նրա անբաժան մասն են։