Նրանք էլ համոզված են, որ սա շոուի համար է. Վահրամ Բաղդասարյանը՝ «Ելք»-ի՝ ԵԱՏՄ-ից դուրս գալու նախագծի մասին

«Ելքը» համոզված է, որ ԵԱՏՄ-ից դուրս գալու մասին նախաձեռնությունը մերժվելու է. ԱԺ ճեպազրույցների ժամանակ տեսակետ հայտնեց ԱԺ ՀՀԿ խմբակցության ղեկավար Վահրամ Բաղդասարյանը: «Նրանք իսկ համոզված են, որ սա մերժված նախագիծ է»,- ընդգծեց նա: 

Բաղդասարյանի խոսքով՝ «Ելք»-ի ներկայացրած հիմնավորումը փաստարկված չէ։ Նա կոչ արեց դիտարկել կառավարության ներկայացրած հաշվետվությունն ու նշեց, որ չկա «Ելք»-ի մի հիմնավորում, որը հիմք ունենա։

«Պարզապես չէի ցանկանա շատ մանրանալ, որովհետև նրանք իսկ համոզված են, որ սա, ներողություն արտահայտությանս համար, շոուի համար է։ Հերթապահ ձևով դրել են, որպեսզի իրենց նվիրվածությունը հայտնեն»,- ասաց նա` չմանրամասնելով, թե ում են նվիրվածություն հայտնում: