Ինչ-որ մեկի չար կատակն էր. նախարարությունում ռումբ չի հայտնաբերվել

Քիչ առաջ ավարտվեցին տրանսպորտի և կապի նախարարությունում ռումբի որոնողական աշխատանքները:

Երևան քաղաքի փրկարարական վարչության պետի տեղակալ գնդապետ Արմեն Բադալյանը լրագրողներին հայտնեց, որ շենքի բոլոր հարկերը ստուգելուց հետո պարզվեց, որ ոչ մի ռումբ չկա: «Ինչ-որ մեկի չար կատակն էր»,- ասաց նա, ապա հավելեց, որ աշխատակիցներն արդեն կարող են վերադառնալ բնականոն աշխատանքին:

Նշենք նաև, որ արդեն ձերբակալված կասկածյալի մասին ոստիկանությունը դեռ ոչինչ չի հաղորդում: Ըստ ականատեսների` կասկածյալը նախարարության նախկին աշխատակից է:

Հիշեցնենք, որ այսօր` ժամը 10:26-ին, ոստիկանությունից տեղեկություն է ստացվել, որ տրանսպորտի նախարարությունում ռումբ կա տեղադրված: Աշխատակիցներին տարհանել են:

Դեպքի վայր էր մեկնել մեկ մարտական հաշվարկ, Հատուկ նշանակության փրկարարական աշխատանքներ իրականացնող կենտրոնի փրկարարական ջոկատը, Ճգնաժամային կառավարման ազգային կենտրոնի արտակարգ իրավիճակների արձագանքման և սակրավորների խմբերը: