Փոխզիջումը պետք է լինի ոչ ի վնաս երկու ժողովուրդների. Զախարովան` ԼՂ հակամարտության մասին

 Ավանդական   ճեպազրույցի ընթացքում ՌԴ ԱԳՆ պաշտոնական ներկայացուցիչ Մարիա Զախարովան անդրադարձել է ԼՂ հակամարտության կարգավորմանը:

«Թե' Հայաստանը, թե' Ադրբեջանն ունեն խնդրի լուծման իրենց տեսակետները: Գոյություն ունի խնդրի լուծման հաստատված ձևաչափ, որը ենթադրում է փոխզիջման որոնում: Դա կողմերի դիրքորոշումների մոտեցում է ենթադրում ՝ անկախ նրանից, թե երբեմն որքան տրամագծորեն հակառակ դրանք կարող են լինել»,- ասել  է նա:

Զախարովան նշել է, որ իրադրությունը լուծման, առաջ մղման անհրաժեշտություն ունի: «Այդ պատճառով վերջին շրջանում ակտիվացել են շփումները, որոնք իրականացվում են տարբեր ձևաչափերով»,- ասել է նա:

Ըստ Զախարովայի` Ռուսաստանը, որպես ձևաչափի մասնակից, անում է ամեն բան, որպեսզի փոխզիջում գտնվի: «Իհարկե, ցանկալի է, որ այն հնարավորինս շուտ գտնվի, սակայն` ոչ ի վնաս երկու ժողովուրդների, նաև  Լեռնային Ղարաբաղում բնակվող մարդկանց ապագայի»,- ասել է նա: