Ապահովել զուգարանների ու աղբամանների հասանելիությունը զբոսաշրջիկների համար. վարչապետ

Այսօր կառավարության նիստում  վարչապետ Կարեն Կարապետյանը կրկին անդրադարձավ «Մաքուր Հայաստան» ծրագրին: Նա նախ նշեց, որ անցկացված համապետական շաբաթօրյակից պարզվեց, որ, նախնական տվյալներով, 750 տնտեսվարող սուբյեկտներ չունեն աղբահանության ծառայությունների համապատասխան պայմանագրեր, և չի բացառվում, որ լրացուցիչ ուսումնասիրություններից կարող են այլ տնտեսվարողներ ևս հայտնաբերվել: Նա տարածքային կառավարման և զարգացման նախարարին և մարզպետերին հանձնարարեց մեկ շաբաթվա ընթացքում ներկայացնել մայիսի 27-ին տեղի ունեցած շաբաթօրյակի արդյունքների վերաբերյալ տեղեկատվություն: 

Վարչապետը հանձնարարեց նաև գույքագրել զբոսաշրջային վայրերում աղբամանների, զուգարանների, գազալցակայանների թիվը: Ըստ այդմ` անհրաժեշտության դեպքում պետք է ապահովել դրանց հասանելիությունը քաղաքացիների համար՝ ըստ հաստատված նորմատիվների պահանջների։ Նա ասաց, որ ոստիկանությունը տեղեկացրել է, որ ճանապարհների վրա համապատասխան աղբամաններ չկան։

«Ըստ նորմատիվի՝ գազալցակայանը և սննդի օբյեկտները, հասարակական օբյեկտները պետք է ունենան նորմերին համապատասխան որակի զուգարաններ և աղբամաններ»,- ընդգծեց վարչապետը և կոչ արեց նորմատիվը դարձնել օգտագործելի: