Ձեզ ենք փոխանցում անկախ Հայաստան, ազատագրված Արցախ. Վերջին զանգը` թիվ 54 դպրոցում

Հուզմունք, կիսատ մնացած բանաստեղծություն և շնորհակալական խոսքեր. այսօր շրջանավարտները նշում են Վերջին զանգը: ՀՀ ԿԳ նախարարի պաշտոնակատար Լևոն Մկրտչյանը թիվ 54 դպրոց էր այցելել` ներկա գտնվելու շրջանավարտների Վերջին դասի արարողությանը:

Նախարարը, շնորհավորելով շրջանավարտներին, նշեց, որ մեր երկրի ապագան նրանք են: «Դուք կյանք եք մտնում մեր երկրի համար բավականին վճռական և դեռևս շատ-շատ հարցականներ ունեցող փուլում: Մենք ձեզ` որպես նոր եկող սերնդի, փոխանցում ենք անկախ Հայաստան, ազատագրված Արցախ, մեր հայկական կենսագործունեության նկատմամբ հպարտության զգացում: Դուք պետք է վերցնեք այս դրոշը և այն տանեք առաջ` մեր նպատակների իրականացման համար»,- ասաց Մկրտչյանը` հավելելով, որ ցանկանում է, որպեսզի նրանք ապրեն ու ստեղծագործեն ազատ, ուժեղ պետականության մեջ:

Ըստ նրա` հենց այս սերունդը վաղը շարունակելու է իր, մեր ընթացքը, իսկ մեր տարածաշրջանն այնպիսին է, որ պետք է դիմակայենք նոր մարտահրավերների: «Թե նրանք որքան ամուր կլինեն, ինչքան կապված կլինեն մեր հայրենիքին, դա նաև մեր երկրի վաղվա օրը կորոշի»,- ասաց Մկրտչյանը:

Վերջին դասի արարողությունից հետո շրջանավարտները ծաղիկների փոխարեն Սուրբ Նարեկ նվիրեցին ուսուցիչներին:

Մանրամասները` տեսանյութում, լուսանկարներն` այստեղ: