Ադրբեջանը հրթիռ է կիրառել՝ ոչնչացնելով ռազմական տեխնիկա. ԵԱՀԿ Մինսկի խմբի հայտարարությունը

ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին և Ռիչարդ Հոգլանդը հայտարարություն են տարածել շփման գծում վերջին օրերին սրված իրավիճակի վերաբերյալ:

ԵԱՀԿ Մինսկի խմբի պաշտոնական կայքէջում հրապարակված հայտարարության մեջ մասնավորապես ասվում է. «Զանազան վստահելի աղբյուրներից հավաքած տեղեկությունների համաձայն՝ մայիսի 15-ին Ադրբեջանը շփման գծում կիրառել է հրթիռ ՝ ոչնչացնելով ռազմական տեխնիկա։ Մայիսի 16-ի երեկոյան և մյուս օրը՝ մայիսի 17-ին, հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի այս գործողությունները հրադադարի ռեժիմի լուրջ խախտում և տագնապի պատճառ են»։

Հայտարարության մեջ նշվել է, որ համանախագահներն ու ԵԱՀԿ գործող նախագահի անձնական ներկայացուցիչը շարունակում են նոր տեղեկություններ և վերլուծություններ հավաքել՝ ներկայիս իրավիճակի շուրջ ավելի ամբողջական և հստակ պատկեր ստանալու համար։

«ԵԱՀԿ Մինսկի խմբի համանախագահները դատապարտում են հրադադարի ռեժիմի վերջին խախտումները և կողմերին կոչ անում հարկ եղած քայլերը ձեռնարկել հակամարտության գոտում հետագա լարվածությունը կանխելու նպատակով»,- նշվում է ԵԱՀԿ Մինսկի խմբի համանախագահների հայտարարության մեջ։