11 դիմումատուներից բոլորն էլ կարող են ստանալ մանդատ. Տիգրան Մուկուչյան

Պատգամավորի մանդատից հրաժարվելու վերաբերյալ ԿԸՀ ներկայացված բոլոր դիմումները նոտարական վավերացմամբ են եղել. այսօր ԿԸՀ նիստի ընդմիջման ժամանակ լրագրողներին ասաց ԿԸՀ նախագահ Տիգրան Մուկուչյանը:

Նրա խոսքով՝ ինքնաբացարկի դիմում ներկայացրած թեկնածուների անունների հրապարակման նպատակն այն էր, որ եթե լինեն մարդիկ, ովքեր առարկություններ ունեն, դրանք ներկայացնելու ժամանակ ունենան:

Մուկուչյանը նշեց, որ ինքնաբացարկի դիմումի չեղարկման պահանջով 11 դիմումների հեղինակները կարող են ստանալ մանդատ, եթե, ԸՕ-ի պահանջներին համապատասխան, նրանց հասնում է մանդատ:

«Կարող են լինել թեկնածուներ, ովքեր կստանան մանդատ և գուցե լինեն այնպիսի թեկնածուներ, ովքեր չեն ստանա: Ենթադրենք` կուսակցությունը տվյալ ընտրատածքից ստանում է երկու մանդատ, հիմա` առաջին երկու տեղերը զբաղեցնող` ավելի շատ քվեներ ստացողներից երկուսն էլ դիմում են ներկայացրել, բայց այդ տարածքից տվյալ կուսակցությունն ունի մեկ մանդատ: Օրենքի պահանջով՝ մանդատը կտրվի այն թեկնածուին, ով ավելի շատ քվեներ ունի, տվյալ պարագայում` թեկնածուներից մեկը կստանա մանդատ, մյուսը՝ ոչ»,- ասաց Մուկուչյանը: