Ես կապ չունեմ Այնթապի ավտոբուսի ֆինանսավորման հետ. Մուրադ Մուրադյան

Արարատի մարզի Այնթապ գյուղի միջհամայնքային ավտոբուսն արդեն երրորդ օրն է` չի աշխատում: Այդ ավտոբուսով երթևեկում էին հիմնականում գյուղի դպրոցականները` դպրոց հասնելու համար: Ըստ լուրերի` երթուղու ծախսերը ֆինանսավորում էր ՀՀԿ-ական պատգամավոր Մուրադ Մուրադյանը, ով, այս խորհրդարանական ընտրություններում բավարար ձայներ չհավաքելով, դադարեցրել է երթուղու ֆինանսավորումը: Սակայն Yerkir.am-ի հետ զրույցում Մուրադ Մուրադյանը հերքեց այդ լուրերը` ասելով, որ ինքը երբևէ կապ չի ունեցել այդ երթուղու ֆինանսավորման հետ:

«Թող այդ ավտոբուսի վարորդը գա, ես նրան հարցնեմ, թե ես ի՞նչ կապ ունեմ այդ ավտոբուսի հետ, ես որևէ անգամ վճարե՞լ եմ երթուղու ծախսերը: 5 թոռ ունեմ, որ տարբեր քաղաքներում դպրոց են հաճախում, ես ինչպե՞ս կարող եմ նման բան ինձ թույլ տալ»,- ասաց նա:

Հարցին, թե ինչո՞ւ է այդ դեպքում ավտոբուսի շահագործման հարցը կապվում իր անվան հետ, Մուրադ Մուրադյանը պատասխանեց, թե որոշ սրիկաներ են նման լուրեր տարածում: