Ժամանակն է՝ հայերի դեմ վայրագություններին տալ իր անունը. ԱՄՆ կոնգրեսականները Թրամփին կոչ են արել ճանաչել Ցեղասպանությունը

ԱՄՆ նախագահ Դոնալդ Թրամփին ուղարկվել է 84 կոնգրեսականի կողմից ստորագրված նամակը, որում կոչ է արվում ճանաչել Հայոց ցեղասպանությունը:

Ըստ «Գանձասար»-ի՝ ԱՄՆ Հայ Դատի հանձնախումբը տեղեկացրել է, որ Կոնգրեսում հայկական հարցերի հանձնախմբի համանախագահ Ֆրանկ Փալոնը կոչ է արել հաշվի առնել մարդու իրավունքների պաշտպանության գործում ԱՄՆ-ի` առաջատար լինելու հանգամանքն ու այս տարի նախագահի ելույթում պատշաճ կերպով 1915 թվականին կատարվածը որակել որպես ցեղասպանություն:

«Ավելի քան 100 տարի է անցել Հայոց ցեղասպանությունից, և ժամանակն է ճանաչել հայերի նկատմամբ իրականացված վայրագությունները՝ հստակ կոչելով իր անունով՝ ցեղասպանություն: Դա նախագահության առաջին փուլում կարող է լինել հզոր հայտարարություն նախագահ Թրամփի կողմից՝  հիշելով 1.5 միլիոն հայերին, որոնք Օսմանյան Թուրքիայի կողմից 20-րդ դարի սկզբին իրականացված ցեղասպանության անմեղ զոհերն են»,- նշել է նա: