Օտարերկյա քաղաքացիների մուտքի դեպքում վերացվում է դիմում-հարցաթերթիկ լրացնելու պահանջը

Այսօր կառավարության նիստում, նախքան օրակարգին անցնելը, վարչապետ Կարեն Կարապետյանը հանձնարարական տվեց օտարերկրյա քաղաքացիների մուտքի արտոնագրի վերաբերյալ:

«Զբոսաշրջության խթանման, զբոսաշրջիկների համար անհարկի բարդությունները, մասնավորապես` ՀՀ պետական սահմանի անցման կետերում օտարերկրյա քաղաքացիների մուտքի արտոնագիր տրամադրելիս դիմում-հարցաթերթիկների լրացումն ու մուտքի վիզայի պետական տուրքի գանձումը կանխիկ եղանակով վերացնելու նպատակով հանձարարական է տրվում»,- ասաց վարչապետը:

Մասնավորապես` հանձնարարեց ոստիկանությանը` մեկ շաբաթվա ընթացքում շահագրգիռ մարմինների հետ կառավարության հաստատմանը ներկայացնել որոշման փոփոխության որոշման նախագիծ, որով առաջարկվում է վերացնել օտարերկրյա քաղաքացիների համար դիմում-հարցաթերթիկ լրացնելու պահանջը սահմանային անցակետերում:

Հանձնարարվեց նաև ֆինանսների նախարարին քննարկել ու ներկայացնել համապատասխան առաջարկություն պետական սահմանի անցակետերում ՀՀ մուտքի վիզայի վճարի գանձումը անկանխիկ եղանակով գանձելու վերաբերյալ: