Ճապոնիայում ձյան առատ տեղումները հանգեցրել են տրանսպորտի աշխատանքի խափանումների

Ճապոնական ծովի և Խաղաղ օվկիանոսի ափամերձ հատվածում՝ Ճապոնիայի արևմտյան հատվածում, ձյան առատ տեղումները հանգեցրել են տրանսպորտի աշխատանքի խափանումների, հայտնում է «ՌԻԱ Նովոստի»-ն:

Երկրի հարավ-արևմուտքում գտնվող Տոտորի պրեֆեկտուրայում Ճապոնական ծովի ափին ձյան շերտի բարձրությունը հասել է 91 սանտիմետրի, ինչը նորմայից 10 անգամ ավելի է: Օդերևութաբանների կանխատեսումներով՝ մոտ օրերս ձյունը կարող է միայն ուժեղանալ:

Տոտորիում տապալված ծառի պատճառով ամբողջ գիշեր խափանվել է էլեկտրագնացքի աշխատանքը: Առավոտյան ծառը հեռացվել է, բայց երկաթուղային գծերին հավաքված ձյան պատճառով գնացքը կարողացել է միայն 300 մետր շարժվել:

Ավտոճանապարհներին առաջացել են մեծ խցանումներ:

Սիձուոկա պրեֆեկտուրայում ուժեղ ձյան հետևանքով առաջացած ճանապարհային վթարների պատճառով հիվանդանոց է տեղափոխվել վեց մարդ: