«Ասեմ` պարտքեր ունեին, սուտ կլիներ». Հնաբերդում կախված են գտել նախ հորը, ժամեր անց` որդուն

Արագածոտնի մարզի Հնաբերդ համայնքում ողբերգական դեպք էր տեղի ունեցել: Yerkir.am-ի հետ զրույցում Հնաբերդի գյուղապետ Գոռ Հունանյանը նշեց, որ փետրվարի 8-ին գյուղի խորդանոցից մեկում կախված են հայտնաբերել 60-ամյա Մեսրոպ Ալամյանին, իսկ մեկ օր անց նրա տղային` 34-ամյա Դերենիկ Ալամյանին:

Գյուղապետը նշում է, որ համագյուղացիները ցնցված են` Ալամյանների ընտանիքը գյուղի հաշտ ու խաղաղ ապրող ընտանիքներից մեկն էր:

«Նորմալ ապրում էին: Որ ասեմ` պարտքեր ունեին, սուտ կլինի: Աշխատող, ապրող ընտանիք էր: Ընտանիքի ներսում էլ որևէ լուրջ խնդիր չկար, իրենց հոգսերով ապրող ընտանիք էր: Առողջ, բանական մարդիկ էին, չենք հասկանում` ի՞նչը կարող է պատճառ լինել»,- ասաց գյուղապետը:

Նա տեղեկացրեց նաև, որ Դերենիկ Ալամյանն ամուսնացած էր, երկու դպրոցահասակ երեխա ունի:

Հոր և որդու հոգեհանգիստը տեղի կունենա այսօր: